ქართული ფეხბურთის 100 მილიონის ამბავი

სპორტის სამინისტრო ფეხბურთის განვითარების სტრატეგიას დღე-დღეზე გამოამზეურებს. ასეთია საფეხბურთო სამყაროს მოლოდინი. სტრატეგია ისეთი იქნება, რომ ქვა უნდა გახეთქოს და მომავალი წლების მანძილზე ფეხბურთში 100 მილიონი ლარი უნდა ჩაიდოს. გაგიხარიან როგორ ლამაზად ჟღერს. 100 მილიონი ლარი. არც მეტი, არც ნაკლები. როგორც იტყვიან კაპიკი არ უნდა დააკლდეს.  

სახადივით არის. წინა ხელისუფლებასაც უყვარდა ციფრი 100. გახსოვთ ალბათ, აბა რა ჯანდაბა დაგვავიწყებს 100 საავადმყოფოს პროგრამას; 100 უფასო სასადილოს; 100 დასაქმების ცენტრს. არც მეტი არც ნაკლები ასი ჩემო ბატონო. 

ახლა სპორტის ჯერია. 100 მილიონი ლარი. ჰა, რავარია? 

ფეხბურთის განვითარების პროგრამაც ჯადო სიტყვაა. თბილისის ზღვაზე რომ ”არაშენდას” ეძახიან იმას ჩამოჰგავს. თაობები წერენ და ვერა და ვერ დაადგა საშველი. გახსოვთ ალბათ, უმცროსი ახალკაცის დროსაც აქტუალური იყო ეს დოკუმენტი. ისიც გახსოვთ სფფ-ს მაშინდელმა ხელმძღვანელობამ ბრიტანული კომპანია, რომ დაიქირავა მის მოსამზადებლად. პიარის ამბავიც იყო მაშინ. თვით ფეხბურთის შემქნელები და ჩვენში ჩამომტანნი გვიმზდებდნენ საფეხბურთო სტრატეგიას. ბრიტანელი ექსპერტები (ოჰ რა საშინელი სიტყვაა) საქართველოში ჩამოვიდნენ, როგორც იტყვიან საველე სამუშაოებიც ჩაატარეს. დოკუმენტიც მომზადდა და ქართულ მხარეს გადმოეცა მაგრამ ... კაცმა არ იცის სად არის ახლა ის საქაღალდე ეს დოკუმენტი რომელშიც იდო. უმცროსმა ნოდარ ახალკაცმა და მისმა დამქაშებმა წაიღეს, თუ ვაკეში მდებარე ქართული ფეხბურთის სახლში, ერთ-ერთ თაროზე დაინავა. ის დოკუმენტი არც საჯარო გამხდარა და არც არავის უმსჯელი მასზე. კაცმა არ იცის ვარგოდა, არ ვარგოდა. მაშინ არც თუ ცოტა თანხა დაუჯდა ის ქვეყნის ბიუჯეტს. იქნება და ჯერ ის დოკუმენტი მოგვეძებნა და მერე განგვეხილ-დაგვეწერა ახალი პროგრამები.  

ერთი სიტყვით აღდგომა და ხვალეო. პროგრამაც დამტკიცდება და 100 მილიონს კაპიკი არ უნდა დააკლდეს. პროგრამისა მჯერა, რადგან როდეს ყოფილა და არს აქამომდის ქართველებს სადღეგრძელოს წარმოთქმა ან დაწერა შეგვშლია. სიმართლე გითხრათ მე უფრო ის 100 მილიონი ლარის ამბავი მაინტერესებს. საიდან უნდა მოვიდეს და სად უნდა წავიდეს. პრინციპში ადრესატი მეტ-ნაკლებად გასაგებია. აი საიდან უნდა მოვიდეს კი ... სპორტის პირველკაცმა ჯადოსნური სიტყვა ”ბიუჯეტი” ახსენა. ეგაა იქიდან უნდა წამოვიდესო ასე უბრძანებია ამას წინათ ზესტაფონში ყოფნისას ბ-ნ ყიფიანს. აი ბიუჯეტში კი ვინ უნდა შეიტანოს და როგორ ამას კი აღარ ამბობენ. 

ფეხბურთი საერთო სახალხო თამაშია. ხალხისთვის შექმნილი, მაგრამ ჩვენში ისეა რომ მის მიმართ ინტერესი წლიდან წლამდე იკლებს. გადავხედოთ სტატისტიკას - გორში, ფოთში, ქუთაისში, ზუგდიდში, ზესტაფონში - ტრადიციულ საფეხბურთო ქალაქებში ფეხბურთზე დამსწრე საზოგადოება იკლებს. თბილისზე აღარაფერს ვამბობ. საზოგადოებას სანახაობაზე მეტად პურს ითხოვს, რადგან: 1) საქსტატის მონაცემებით ქვეყნის სამუშაო ძალის 15 % სამსახური არ ააქვს, არაოფიციალურად კი 33% თავს უმუშავარს უწოდებს; 2. ქვეყანას 250,000 დევნილი ყავს, რომელიც მუდამ დახმარების მოლოდინშია; 3. განათლების სისტემა კატასტროფულ მდგომარეობაშია; 4. ქვეყანაში 1 მილიონი პენსიონერი ცხოვრობს, რომლებიც თვეში 125 ლარზეა, რაც დღეში 4 ლარს უტოლდება! 5. ორ მილიონამდე საქართველოს მოსახლე სოფლადაა და იქაც იმიტომ ითვლება დასაქმებულად, რომ საკარმიდამო მიწის ნაკვეთი გააჩნია. დემოკრატიის ანა-ბანაა - Demos Kratos! უნდა კი გადასახადის გადამხდელ Demos-ს 100 მილიონი ლარი ფეხბურთში ჩადოს? თუ ურჩევნია მაგალითად ჭიდაობას, კალათბურთს, რაგბს ანაც გნებავთ ბალახის ჰოკეის განვითარებას მოახმაროს. კაცმა არ იცის, რადგანაც ხალხს ამ საკითხზე არავინ დალაპარაკებია. ამ გადაწყვეტილების ფონიც გასათვალისწინებელია - ამ გადაწყვეტილების მიღებას მაშინ ვაპირებთ, როდესაც ქვეყანაში დიდი საერთაშორისო დახმარება აღარ შემოდის, ინვესტიციები იკლებს და ეკონომიკური ზრდაც შემცირებულია. 

ლევან ყიფიანი

კაცმა არ იცის რამდენად შეძლებს მთავრობის სხდომაზე სპორტის მინისტრი ამ იდეის გატანას, რადგანაც იქ ყველა უწყება საბნის თავისკენ გადაქაჩვას ცდილობს, ფინანსთა სამინისტრო კი თითოელ თეთრს ითვლის. ლევან ყიფიანი არ არის მინისტრი-ბულდოზერი, რომელსაც შეუძლია კედელი შუბლით გაიტანოს და ნებისმიერი იდეა დააკანონოს. იგი დიდად არც პრემიერ-მინისტრის ფავორიტ მინისტრად ითვლება.   ამას გარდა პრემიერ-მინისტრი ფეხბურთითაც არ უნდა იყოს დაინტერესებული.  აკი ამას წინათ იყო ერთ-ერთ ინტერვიუში ჩვეული გულრწფელობით რომ განაცხადა 10 საათისვის ვიძინებო (არადა ჩვენში ჩემპიონთა ლიგის თამაში, როგორც წესი 23:45-ზე იწყება), განთქმული მეცენატობის მიუხედავად დიდად არც მშობლიური კუთხის საფეხბურთო კლუბის დაფინანსებაზე მოუკლავს თავი. 

თუმცა ის 100 მილიონი მაინც შთამბეჭდავად ჟღერს. ჯერ იყო 100 საავადმყოფო, მერე 100  უფასო სასადილო, ახლა კი 100 მილიონს კაპიკი არ უნდა დააკლდეს. ასე უბრძანებიათ იქ ზემოთ.  

ვაჰიდ ჰალილჰოჯიჩი