ბოტოქსი

ნეტავ კიდევ რამდენ ხანს იქნება პოპულარული საქართველოში ფრაზა - ”გუნდის გაახალგაზრდავება?”

ამ რიტორიკული კითხვის პასუხი, არც ისე იოლი ჩანს, რადგან მგონი, ქრონიკულშიც კი გადაეზარდათ ჩვენს ფეხბურთში დასაქმებულ ბიძიებს. 

გუნდის გაახალგაზრდავება - ფენომენალური გამოგონებაა, რომელიც ნებისმიერი სეზონის წინ, სეზონის შუაში, სეზონის ბოლოს, უფრო მეტიც, ნებისმიერი ტურის წინ შეგიძლია გამოიყენო და ამას წლებია, ვყლაპავთ და ვყლაპავთ ... არავინ არაფერს აპროტესტებს, არავის უჩნდება წინააღმდეგობის სურვილი ... დაიღალა ხალხი ... ისედაც რა ქომაგთა სიმრავლით გამოირჩევიან ქართული კლუბები, მაგრამ ვინც არიან, ისინიც მაგრად დაიღალნენ ... 

ეგ კი არა, ის ამბავიც კარგად ვიცი, რამდენიმე წლის წინ 25-26 წლის ფეხბურთელი რომ დაიწუნა ერთმა კლუბმა - ძალიან კი მჭირდები, მაგრამ ჩემი გუნდისთვის დიდი ხარო ... კი ბატონო, იქნება ამ კონკრეტულ შემთხვევაში ასაკი არც არაფერ შუაში იყო და ეგებ ასე მოიშორეს ის ბიჭი, მაგრამ ხომ ფაქტია, რომ მიზეზის საძიებლად შორს წასვლა არ გაუხდათ საჭირო? ზუსტად ამას ვამბობ: გაახალგაზრდავება და მორჩა. დამთავრებული ამბავია! 

ასე იყო 1990 წლიდან 2000-მდე და ასეა 2000-დან დღემდე ... ათწლეულებია უკვე, გაახალგაზრდავება მოდაშია, მაგრამ რას ვაახალგაზრდავებთ ასე გამალებით, ჯერაც ვერ გამიგია ... წავუმიამიტებ და, მართლაც ასე მალე ბერდებიან ეს ჩვენი ბედოვლათი ფეხბურთელები?! 

ესაა, და ქუთაისის ”ტორპედოს” ფან-კლუბის საქციელმა ცოტა კი გამაკვირვა. არა, მათ არაორდინალური და მიუღებელი არაფერი გაუკეთებიათ, მაგრამ მაინც არ ველოდი - ”ჯუნგლებმა” ღიად გაილაშქრეს კლუბის ხელმძღვანელთა წინააღმდეგ და მათი პოლიტიკა საჯაროდ დაგმეს. 

”ტორპედოს” ამბავი გეცოდინებათ - ძლივს აკოწიწებულ-აშენებულ-რელსებზე შემდგარი გუნდი ზედ ევროთასების წინ მარტივ მამრავლებად დაშალეს და თბილისის ”ლოკომოტივიდან” წაყვანილი 17-18 წლის ბავშვებით ჩაანაცვლეს. არავის არაფერი აქვს ამ ბავშვების საწინააღმდეგო და მეც ზუსტად მივუხვდი ”ჯუნგლებს”. მით უმეტეს, ჩემამდეც მოაღწია ხმამ, რომ ლოკომოტიველი ახალწვეულების მშობლები თუ ახლობლები ძალიან გულგატეხილნი დარჩნენ ქუთაისელი ქომაგების ”გულცივობით”. მაგრამ აბა იმ ბიჭებს ვკითხოთ, დღედაღამე ”ტორპედოს” რომ არ მოშორებიან გვერდიდან, წვიმასა და მზეში, ქარსა და თოვლში რომ ამხნევებდნენ?! აბა ვკითხოთ და ვუთხრათ, ის გუნდი აღარ გვინდა, მოდი ახალი ავაშენოთო?! 

მოკლედ ”გუნდის გაახალგაზრდავების” იდეამ ყველაზე მწვავედი ქუთაისში იწვნია წკიპურტი და ახლა უკვე ”ტორპედოს” თავკაცობას გაფაციცებული სიფრთხილე მართებს, რადგან დიდი ალბათობით, ისინი იმდენა ვერ უნდა ერკვეოდნენ იმაში, რასაც ”ტორპედოს” სტადიონის ლოჟიდან მოპირდაპირე მხარეს მოთავსებული ადამიანთა აქტიური ჯგუფი ჰქვია - ისინი საკუთარ თავს ”ჯუნგლებს” ეძახიან და ჯუნგლებისგან განსხვავებით, მათ კარგად იციან უცხოს პატივისცემა, მაგრამ მწარედ რეაგირებენ დამცირებასა და უსამართლობაზე ... 

სხვა კი ... აგერ ”ჩიხურამაც” მოიშორა ასაკობრივი ბალასტი და საკუთარ ისტორიაში საუკეთესო სეზონის შემდეგ 30 წელს გადაშორებული ფეხბურთელები თვალის დაუხამხამებლად გაუშვა შინ. 

აბა როგორ, ახლა ხომ გაახალგაზრდავების დროა ... 

ფუტ ბოლი