ჯორჯ ორუელს დავესესხები: ”მოეთხოვებოდათ მხოლოდ პრიმიტიული პატრიოტიზმი, რომელზე აპელირებითაც მათ ყოველ საჭირო მომენტში მიაღებინებდნენ გაზრდილ სამუშაო დღეს ან შემცირებულ ულუფას”.
ამ რამოდენიმე კვირის წინ, აზერბაიჯანის პარლამენტში საქართველოს პრეზიდენტის მიერ წარმოთქმულმა სეფე სიტყვამაც სწორედ ასეთი პრიმიტიული პატრიოტიზმი მოითხოვა, ზედმეტი შეკითხვების გარეშე.
საქართველომ აზერბაიჯანი უხერხულ მდგომარეობაში ჩააგდო - უეფას ევროპის ჩემპიონატის თანამასპინძლობა შესთავაზა. აზერბაიჯანი თანამოძმე თურქეთს უნდა დაპირისპირებოდა, ქვეყანას, რომელიც აგერ უკვე რამდენი წელია, დიდი საფეხბურთო ფორუმის მასპინძლობის შანსს ელოდება.
და მერე იყო დუმილი. დუმილი ყველა დონეზე. არსაიდან ხმა, არსით ძახილი. დომენტი სიჭინავამ და რეზო არველაძემ ვერც სტამბულის უეფას კონგრესიდან გვითხრეს რაიმე აზრიანი. ლადო ვარძელაშვილიც დუმდა. უეფას მაღალჩინოსნებმა კონგრესის კვალდაკვალ ევროპირველობის სამასპინძლოდ აუცილებელი მოთხოვნები რომ გამოაგზავნეს, ფეხბურთის დიდმოხელეები კიდევ უფრო გაისუსნენ.
სიჭინავას და არველაძეს სტამბულში უეფას კონგრესის გახსნისთანავე აგრძნობინეს ევროფორუმის მასპინძლობისთვის ბრძოლის უტოპიურობა. მიშელ პლატინიმ ღიად მიანიშნა, რომ ევრო-2020-ის მასპინძელი თურქეთია. ნათქვამი იმდენად მკაფიოდ ჟღერდა, რომ თვით გერმანიამაც კი ევროპირველობის მასპინძლობის სურვილზე უარი თქვა.
თუმცა, პრიმიტიული პატრიოტიზმი თავისას ითხოვდა, ზედმეტი კითხვებისა და ახსნა-განმარტებების გარეშე.
ფაქტია - იდეა თათარიახლად მომზადდა. არავითარი შეფასების დოკუმენტი, არავითარი SWOT ანალიზი, არავითარი ნიადაგის მოსინჯვა უეფაში, თურქეთსა თუ აზერბაიჯანში. უბრალოდ და პრიმიტიულად - აზერბაიჯანი-საქართველო ევრო-2020!
ახლა ყველაფერი უკან მოვიტოვეთ ... აზერბაიჯანმა შუა გზიდან გვიგანა. მორჩა, დეპოში ვართ! დღეს ევრო-2020-ის მასპინძლობაზე განახცადების შეტანის ვადა დასრულდა და სფფ-მაც პრიმიტიულ პატრიოტიზმს ხარკი გადაუხადა. განაცხადი შეტანილია.
უეფამ ერთხელ უკვე გაიარა ბეწვის ხიდზე, როდესაც პოლონეთ-უკრაინას სიტყვაზე ენდო და ევროპირველობის მასპინძლობის უფლება ”პოსლეზე” - აუცილებელი ინფრასტურქტურის გარეშე გადასცა. სანამ უეფაში ის ხალხი იქნება, ვინც ეს ბეწვის ხიდი გადაიარა, ევროპირველობის მასპინძლობის უფლებას ნისიად აღარავინ გასცემს. თავს ნუ მოვიტყუებთ, ჩვენი არც ერთი სტადიონი (მათ შორის, მრავალ პატრონ და სახელგამოცვლილი ”დინამო არენა”) ევროფორუმის მასპინძლობის მოთხოვნებს არ პასუხობს. იქ, უეფაში კი ევრო-2012-ის გადამკიდე, დღევანდელი კვერცხი ურჩევნიათ ხვალინდელ ქათამს.
ევროპირველობა ცოტა უფრო მეტია, ვიდრე საქართველოს ჩემპიონატის უმაღლესი ლიგის თამაში, რომელიც შეგიძლია ”ქართლზე” ჩაატარო, სადაც ბალახს მშიერი ძროხაც კი აქა-იქ თუ იპოვის.
 |
| სტადიონი ”ქართლი” |
სხვა რამე-რუმეებს რომ თავი დავანებო, ევროპირველობისთვის, სულ მცირე, თორმეტი მეოთხე კატეგორიის სტადიონია საჭირო. მეოთხე კატეგორიის სტადიონის მინიმალური მოთხოვნები კი ასეთია:
- მინდორი - 105X68-ზე;
- 20 კვ. მეტრის მსაჯთა გასახდელი, ორი საშხაპით, ერთი ტუალეტით, ექვსი სკამითა და მაგიდით;
- 1400 ლუქსის სიმძლავრის განათება, რომელიც თანაბრად გაანათებს მთელ სტადიონს;
- 800 ლუქსის სიმძლავრის სათადარიგო განათება;
- 150 VIP სტუმრის მანქანის პარკირებისათვის საჭირო სივრცე;
- ბილეთების ელექტროკონტროლის მოწყობილობები;
- მინიმუმ 8,000 სავარძელი მაყურებლებისათვის;
- შესაბამისი კომუნიკაციის საშუალებით აღჭურვილი სტადიონის საკონტროლო ოთახი;
- სათვალთვალო ვიდეოკამერებით აღჭურვილი სტადიონის შიდა და გარე პერიმეტრი, რომელიც დაკავშირებული იქნება საკონტროლო ოთახთან;
- 500 ადგილი VIP სტუმრისთვის;
- 400 კვ. მეტრის ფართის კაფე, რომლითაც მხოლოდ VIP სტუმრები ისარგებლებენ;
- მას მედიის მუშაობისათვის 200 კვ. მეტრის სივრცე, რომელიც 75 მედიის წარმომადგენელს დაიტევს;
- ცალკე გამოყოფილი სამუშაო სივრცე 25 ფოტოჟურნალისტისთვის;
- 10 კვ. მეტრის სივრცის ოთხი ცენტრალური ვიდეო კამერისათვის ტელერეპორტაჟის საწარმოებლად;
- 100 კაცზე გათვლილი პრესლოჟა, რომელიც აღჭურვილი იქნება 50 მაგიდით;
- 25 საკომენტატორო ჯიხური ტელე-რადიო კომენტატორებისათვის;
- 25 კვ. მეტრის ფართის მქონე ორი ტელესტუდია, რომელთაგან ერთ-ერთს უნდა ჰქონდეს მინდვრის ხედი;
- ოთხი ადგილი ბლიც-ინტერვიუს ჩასაწერად;
- მოძრავი სატელევიზიო სადგურის განსათავსებლად საჭირო 1000 კვ. მეტრის ზომის სივრცე;
- 75 ჟურნალისტზე გათვლილი საპრესკონფერენციო დარბაზი სტადიონის შიგნით;
- შერეული ზონა მინიმუმ 50 ჟურნალისტისათვის.
ეს მხოლოდ სტადიონები. საქართველოს ევროპის 24 ნაკრების მასპინძლობა მოუწევს და შესაბამისად, ამდენივე საწვრთნელი ბაზა ექნება ასაშენებელი. სასწორის მეორე მხარეს კი თურქეთია, პლატინის მხარდაჭერით, მზარდი ეკონომიკით და კეთილმოწყობილი ინფრასტრუქტურით.
ვაჰიდ ჰალილჰოჯიჩი
No comments:
Post a Comment