ა, ხალხი ... კი გვიშალა პირი აზერბაიჯანმა, ალიევის სანაპიროც დაივიწყა და ფიფა-უეფას მისადგომებიც, მაგრამ მაინც ხომ გააკეთეს ...
არა, სტადიონი, გაზონი, ტრიბუნა და ფეხბურთს რომ სჭირდება მისთანები კი არა - განაცხადი!
 |
| სფფ-ს განაცხადი ევროპის 2020 წლის ჩემპიონატის მასპინძლობის შესახებ |
საერთოდ ამ განაცხადების საქმეში ჩემპიონები ვართ - ევროპისაც და მსოფლიოსიც.
მერე რავარი ლამაზად ჩამოაწიკწიკეს?! იმისათვის, რომ ევროპის ჩემპიონატს ვუმასპინძლოთ - ეს, ეს და ეს გვჭირდება, ამდენი სტადიონი, ამდენი სასტუმროს ნომერი, გზები და ტრანსპორტიო...
პროექტიც თან ახლდა ამ ხალისობას - პროექტი კი არა ”სევერნოე სიიანიეა” პირდაპირ. ისეთი ლამაზადაა დახატული ... უყურებ და გეამაყება კაცს - რა ხელმა დახატა, როდის, სად, როგორ ...
ახლა აშენება ცოტა ძვირი კი დაჯდება და ეგება, მთლად ნახატივით გამართული ვერ იყოს ყველაფერი (ან სახურავი გადააძროს ქარმა, ან დრენაჟი არ გამოადგეს კარგი, ან კიდევ მთლად უკეთესი თუ არა, მთლად უარესი - ბალახმა თქვას უარი ამოსვლაზე), მაგრამ ხომ გავაგებინეთ ვინა ვართ და საით ვაპირებთ სიარულს, ხომ დავაკაკუნეთ უეფას კარებზე ...
 |
| ბათუმის სტადიონის პროექტი |
დავაკაკუნეთ რომელია - დავაბრახუნეთ ...
ზემოთ ჩამოთვლილ რაღაცაებს რაც შეეხება, მოევლება - ისედაც ხომ ვიცით გასაკეთებელი: კიდევ ბევრია.
ის კი არა, იოლადაც გამოვძვრებით - სტადიონებზე განათებები არ დაგვჭირდება. ქვეყანა-შუქურაში პროჟექტორი ვის რა ილიჩის ნათურად ჭირდება - დემოკრატიისაა თუ რაღაცაა შუქურა-შუქურაა და სადაც შუქურაა, ”ლამპუჭკები” რა სახსენებელია.
გასაგებია, რომ ცოტა ფელინის ”ამარკორდსაც” ჰგავს ეს ამბავი. კაცი რომ ხეზე ზის და ”ქალი მინდაო” ყვირის - დაახლოებით ისე ვყვირით ჩვენც, ”ევროჩემპიონატი გვინდაო”, მაგრამ სხვა კუთხიდანაც შევხედოთ ამ საქმეს ... განა ყველა საქციელი გაგახსენებს კაცს ფელინის?! გენიოსს?! იტალიელს?! ოთხგზის მსოფლიო ჩემპიონი ქვეყნის შვილს?!
ხედავთ რა ალეგორიებია? რა ალიტერაციები? რა ბმულები? არა რა ... ცხრიანში ვახვედრებთ ხოლმე ... ნიჭი, ძამიკო, ნიჭი! რაც მეტად უფიქრდებაი კაცი, მით მეტად გჯერა, რომ ეპოქალური განაცხადია - მსოფლიოში საუკეთესო, ისტორიული. ესაა განაცხადი, თორმე ის რა განაცხადია ავსტრია-შვეიცარიელები ან ბელგია-ჰოლანდიელები, რომ აკეთებენ ხოლმე - ქვეყანა ხარ თუ ვინ ხარ, დალოცვილო რატომ გეპარება საკუთარ თავში ეჭვი?! ტყუპი განაცხადი რა არველაძეები ხართ?!
ასე რომ, პირიქით, მადლობა აზერბაიჯანს, მოსალოდნელ დიდებაში არ შეგვეცილა და ევროპის ჩემპიონატში არ ჩაგვეზიარა. ყველამ თავისი ადგილი უნდა იცოდეს - ფეხბურთზეა საუბარი, ”მენავთობე ქალების” გადაღებაზე ხომ არა.
მსოფლიოს მაგალითი უნდა ვაჩვენოთ. ბარე ორს თვალი უნდა დავუვსოთ. ისეთი ჩემპიონატი უნდა მოვაწყოთ, ალი და ნინო ერთმანეთს ასწრებდნენ ქუთაისში, ზუგდიდსა და თბილისში თამაშების სანახავად ჩამოსვლას.
მთავარია არ შეშურდეთ და ახლაც ”მაპზე უკეთესი” არ მოგვცენ - მერე რა, სტადიონები, სასტუმროები და ინფრასტრუქტურა რომ არ გაგვაჩნია ...
პრასი ხომ გვაქვს ...
თედო რიჩი
No comments:
Post a Comment